Għeżież qarrejja,

Dalgħodu qed nikteb wara li ħassejtni ferm kuntent il-Ġimgħa li għadda bl-organizzazzjoni eċċezzjonali illi saret fil-Bar-B-Q.  Kien Bar-B-Q b'differenza!!! Ħalla differenza kbira f'ħajjet diversi klijenti tad-Dar l-Arka.

Xi pjaċir kien hemm!!!  X'emozzjoni hassejt!!! 

Inġbarna fil-ġnien tad-Dar l-Arka, ġnien grandjuż u sabiħ.  Morna aħna l-leġjunarji żgħażagħ mimlijin ħeġġa u enerġija.  Morna biex nieħdu pjaċir.  Imma mhux biss.  Morna biex nagħtu pjaċir lil ħaddieħor.  Għalhekk dan kien Bar-B-Q b'differenza. 

L-ewwel bdejna b'quddiesa li kienet ikkonċelebrata minn Fr. Geoffrey G. Attard.  Ta' min jgħid issa la qegħdin insemmuh.  Nista' nħabbar minn issa li għandna Direttur Spiritwali fil-Kumitat taż-Żgħażagħ li huwa l-istess Fr. Geoffrey.  Fr. Geoffrey huwa bniedem enerġetiku, b'mentalita' żagħżugħa u qiegħed fil-qlub taż-żgħażagħ.  Naf fiċ-ċert li f'din il-kariga, Fr. Geoffrey se jagħti kontribut qawwi u ħa jkun effettiv ħafna.  Apparti minnhekk huwa jaf ikun bniedem li kif ngħidu bl-Ingliż with a sense of humour.  Insomma, nawguralek minn qiegħ qalbna, Fr. Geoffrey, filwaqt li nitolbuk titlob għalina. 

Il-quddiesa kienet waħda speċjali.  Kienet ċelebrazzjoni bejn familja kbira.  Proprjament hija familja maqsuma fit-tnejn.  Familja tal-Arka u familja tal-Leġjun li dawn ingħaqqdu flimkien bħala familja biex jagħmlu ċelebrazzjoni sabiħa akkumpanjata b'mużika bellezza minn band magħmula minn pjanista u percussions, tliet kitarristi, vjolinista u diversi kantanti. Fil-quddiesa, kien hemm diversi nies li taw is-sehem tagħhom u dan għamel il-quddiesa speċjali - quddiesa b'differenza wkoll. 

Wara l-quddiesa, għamilna l-Bar-B-Q, fejn kellna ikel tajjeb ħafna - naħtaf l-opportunita' nirringrazzja lil kull min għen biex għamel l-ikel.  Kellna wkoll entertainment minn Denise, Martha, Marisa, Tabita, Marvic u anke mbagħad kelli niddeffes jiena biex inkanta xi żewġ kanzunetti wkoll!!!

Insomma, għeżież Leġjunarji, tajna spettaklu sabiħ, tajna ħafna pjaċir lil nies oħra li forsi t-tbissima tagħhom ma tantx tkun fuq fommhom.  Tajna pjaċir lil nies li forsi okkażżjonijiet bħal dawn f'ħajjithom huma rari ħafna. 

Dan huwa l-ispirtu Leġjunarju.  Ejjew nibqgħu naħdmu biex il-Leġjun jikber u jissaħħaħ iktar b'dan il-mod.  Nixtieq illi l-Leġjun ta' Marija jkun wieħed effettiv u jkun anki f'qalb kull persuna fid-dinja.  Ninsab ċert li jiena u inti li qed taqra dan il-blog kapaċi nbiddlu d-dinja.

Għal-lum nagħlaq din ir-riflessjoni hawnhekk.  Aħsbu fuq dan li ktibt u araw x'taħsbu.  Grazzi o Marija talli tajtna x-xorti li nferrħu lil ħaddieħor. 

Tislijiet,

David